Osnovna škola A. G. Matoša Novalja - Naslovnica

> Naslovnica

Vijesti

Kako se svoj dan maškaralo?

Autor: Dejan Tauzer, 19. 2. 2009.

Vrijeme je maškara. Sve o karnevalskim običajima u Novalji i okolnim mjestima saznat ćete od naših učenika...

Ovo ča ću sad ispripovidat rekal mi je moj ded. Njemu je sad sedandeset godišć i rado se sjeća mladih danov. Najviše je bilo smiha i sriće za vrime maškar, karnevala. Ljudi su bili manje opterećeni nego danas. Više je bilo veselja nego jada. Siromaštva je bilo u svakoj famelji, šoldov nikud. Radilo se za litru maslinovog ulja, celi božji dan. Dice u svakoj kući sedan, osan, čeljad gladna, žajna, kruh na gredi u kuneštri visi. Mater tira leć, svi napol gladni. Frite i hrostuli su se noćon misili., ali sve bi se zaboravilo na suboti kad su se otvarali maškarani tanci. Sakupljali su se u grupice, maškarali vrićamin, lancuniman i ča je ki do ruke našal. I tako bi se partilo. Uvik su imali plan kod koga poć, tobože boljega gospodara, jer maškare je bilo sramota potirat. Ako se posrići i ako je gospodar raspoložen, još će se i omastit. Pivalo se, skakalo, rakalo, škrebetalo i na Ložu na tanci završavalo. Niki do jutra, a niki i dva tri dana. "Tako je to bilo dico moja, u vrime dedove mladosti." rekal je on. "Danas, fala Bogu, imamo svega i svačega, a od svega ništa, samo sekiraciju. Morebit i grišin jer moje vrime pomalo pasiva zato uživajte dok ste mladi. Život brzo projde i starost gruba dojde."

Jelena Trcol, 8.a

Sad ću vam pripovidat o mesopustu u Novalji onako kako ga pameti moja baba. Na mesopust se ila juha od slanoga mesa i na njoj kuhani makarunići. Taj dan je mesa bilo dosta za svakoga ča inače i ni bilo uvik. Skupljale su se tri grupe maškar. Prvu grupu su činila dica, drugu mladost, a treću stari ljudi. Maškare su se skupile oko dvi ure. Na čelu povorke hodili su Ćalo, Sokolić i Crni. Puhali su u rog, pivali i bukali. Mlaji su svirili mih. Za maškare se ni šila i kupovala posebna roba jer za to ni bilo šoldov. Nastojalo se da maškara bude ča strašnija i grupša. Muški su stavljali na se sedlo i stilju, a na glavu mih. Ženske su nosile starinske suknje, a na glavi facol ili klabuk ča je već ka imala. Povorka je hodila oko celoga mesta, a ljudi su maškaramin davali:vino, suho meso, suhu hobodnicu ili sirčić. Uz veliku ciku i viku došlo se ponovo na Ložu pa se nastavilo tancat naški i popaški i na valcer. Sve to uz mih. Čitala se Jurova oporuka te ga se okrivilo za sve grubo ča se kroz godišće dogodilo. Oporuku je čital i napisat Boris Palčićev, ni se štedilo nikoga. Svakomu je ništo našal da se naruga i da bi se svi tnasmijal. Nagorilo ga se i hitilo more. Onda se šlo doma na vičeru. Za vičeru je bilo slano meso od ubeda. Po vičeri se šlo u dom na tanci. Tancalo je i staro i mlado, a svirali su Anton i Tomislav Migalov i Franja Vidov. Imali su svi inštrumenti, armonigu, bubanj, a Janez je pratil na violini. Tancalo se pivalo i ludovalo do samoga iutra. Ljudi su sebi dali oduška, smiha i razonode. Onda je svanula Čista sreda - Pepelnica, počela je korizma.U korizmi se ni tancalo ni pivalo. Tako je bilo u vrime kad je moja baba bila mlada. Potrudila san se ča bolje opisat starinski novaljski mesopust kakovoga pametu naši stari. Neka i naša lica ozari smih kako i lice moje babe dok mi je ovo govorila. Zato maškarajmo se, tancajmo i ludujmo kako ča su to znali naši stari, da moremo reć našoj dici kako se maškaralo kad smo mi bili mladi.

Nikolina Peranić, 7.b

Svoj dan, vrime od Tri kralji do Čiste srede zvalo se Karneval. Zadnji dan Karnevala zval se Mesopust. U tom vrimenu od Tri kralji do Čiste srede bilo je par četrtkov, a zvali su se Rićavac, Kokošar, Petešar, Tusti i Pusti. Uvik je prvi bil Rićavac, a zadnji dva Tusti i Pusti. Na četrtak, subotu, a nekad i nedilju ljudi su se maškarali i hodili na tanci. Dica nisu hodila š njiman na tanci, al su se isto maškarala i hodila po kućah. Prije Mesopusta bila je Fešta i ili su se makaruni s gulašon. Na Mesopust su se isto ili makaruni s gulašon, a ako bi se skuhali za ubed, onda bi se malo ostavilo i za vičeru. Na Mesopust bi se šlo na tanci. Muški bi vrgli misi od ovce na glavu, a na njemu bi rasporili bužice za virit. I ženske bi se maškarale i hodile na tanci. One bi obukle svitlu robu i vrgle bi facol oli klobuk na glavu. Tanci su trajali samo do pol noći, jerbo bi onda počimala Čista sreda. Malo prije pol noći neki ljudi bi šli domaka poist još čakod mesa, ako je ostalo od ubeda, da ne ostane do Čiste srede. U pol noći je zvonil zvon. Onda bi svi ljudi šli domaka spat. Na tin tanciman bi se čakod i popilo, al bilo je sveto lipo i veselo. Onda bi došla Čista sreda, Mesopust i frajanje je završilo.

Iva Škunca, 7.a

Stara Novalja je malo mesto, ali je uvik bilo veselo na mesopust. Na mesopust se uvik kuhala juha od suhoga mesa, obično od janjetine i svinjetine. Običaj je bil ko i danas da se obilato poide jer je sutradan Pepelnica, dan posta i nemrsa.

Jutro bi se napravljalo mesopusta od slame koga se zvalo Jure. Jura se popodne na tovaru peljalo kroz mesto od kuće do kuće. Obično su ljudi Jura darivali, kako je ki mogal. Neki su davali vino, neki suhe smokve, neki suho meso ili domaći kulen. Maškaralo se staro i mlado. Maškare su hodile skupa s Jurom. To bi tako trajalo do noći, a onda se hodilo na tanci u dom. Imali smo i svog armonikaša, a ako bi on bil bolestan onda bi došal armonikaš iz Novalje. Oko pol noći se čital taštamenat. Taštamenat je pisal obično onaj ki je bil za šalu pa bi bilo smiha i smiha, Kad bi se pročital taštamenat, spaljivalo se Jura na velikoj rivi i hitalo ga more. On je bil kriv za sve jade i nevolje u mestu. Sutradan je bila Pepelnica. Na Pepelnicu su se pekle frite, il se bakalar, pekla se riba, već prema tome kako je ki imal. Počela je korizma.

Mateo Peranić, 7.b

Na zadnji dan karnevala, u mom mistu zamaskirana skupina ljudi ide u povorci od kuće do kuće. Sa sobon vode maskotu našeg mista Juru Bušu. Prije su sakupljali vino, baškotini, jaja, kapulu, suho meso i pancetu. Ako je kuća u ku su ušli bila duga 10 m, onda je ta obitelj morala dati 10 dinara. U kuće su ulazili pjevajući lijepe, šaljive, karnevalske pisme. Nakon povorke su maškare i ljudi obučeni u narodne nošnje plesali kolo oko Doma. Nakon tog čitao se taštament Jure Buše. To su pisme koje se ne rimuju, pjevaju se po jednom muškom članu iz svake kuće. Sa tin pismama Jure Buša svakome nešto ostavlja u nasljedstvo. Prvi taštament Jure Buše u Kolanu se poče čitat 1930.g. i to po običaju s otoka Iža i Ugljana koje su stari Kolanjci prenili u Kolan. Nju je pročita Berto Balabanić u Kebinoj kući. Tom je prilikom Jure Buša ostavio braći Fabijanić iz Šimuni: "Fabijanić braći iz Šimuni ja ostavljam more zgor Mauna, a u njemu dva dupina ljuta da in ribu u mrižamin guta". Iza čitanja Taštamenta su bili tanci do pol noći. Iza ponoći bi maškare presudile Juri Buši, tako da bi ga užgali, višali i streljali, kako ko godišće.

Domagoj Šupraha, 6.a

U mom mistu su prije svi hodili u maškare. Sastali bi se kod nekog i svi se dobro omaškarali i napravili Jura. Obukli bi ga u odijelo od svojih starijih. Jura bi stavili na tovara i krenuli po kućamin. Uvik su bili veseli, pivali bi i tancali, a najviše je bilo smiha s tovaron jer ni otil hodit vazmoracnego samo vazjugo. Tovara i Juru bi vodili u svaku kuću. Ljudi su im davali brašno, jaja, šećer, novaca, hroštule i naranže. Našlo se tu i onih koji bi činli dešpeti po kućamin, ali niki se ni previše ljutil, pa nisu maškare svaki dan. Tako su hodili svaku subotu do kasno u noć. Onda bi kod nekog podilili šoldi i pekli palačinke od onoga ča bi in ljudi dali. Na mesopust bi Jura obisili za štanad , nagorili i hitili u more. Još su celu godinu prepričavali dogodovštine i jedva čekali sljedeće maškare.

Dina Badurina, 6.a

Moja baba i dide pričali su mi kako su oni slavili karneval kad su bili mladi. Okupljali bi se na Dvorima i dogovarali ki će nosit košaru za jaja, mih za vino, ki će nosit Karnevala i od kud će počet. Kad su se dogovorili svi skupa bi šli put Metajne. Na putu do tamo oni bi pivali, tancali i svirali na mišnjice. Iz Metajne bi krenuli u Zuboviće, a iz Zubovića u svoje misto. Kad bi obašli sve kuće šli bi na tanci u dom. U domu je bilo ića i pića. Žene bi frigale fritule, radile makaruni na vreteno, kuvale svinjske nožice, starčevinu, slaninu, a muški bi pekli janjetinu i praščevinu. Za piće su imali vino i prošek. Kad bi se napili i naili, šli bi palit Karnevala. On se zva Jure ili Marko. Kad bi došli na mul, zapalili bi ga i hitili u more, a kad bi pogori vratiti bi se svi zajedno u dom na tanci. Tamo su pivali i tancali kolo sve do jutra, a kad bi došlo jutro svi bi se razašli i šli svaki svojoj kući. Tako se je slavi Karneval na Barbatu.

Barbara Kustić, 7.a

Povratak

Ispiši članak

e-Dnevnik